Tiruleque
A Coruña Trad-Folk
O grupo coruñés Tiruleque naceu como banda en 2002, ano no que se reuniron cinco rapaces procedentes da música tradicional e cunhas inquedanzas musicais compartidas. A partir de entón, o proxecto musical iniciouse como quinteto tradicional que mesturou as fontes da tradición da música galega -tanto a través de recollidas como recorrendo aos cancioneiros- con outras moitas influencias e procurando unha evolución que ao longo dos anos empurrou o grupo a incorporar distintos instrumentos cos que levar máis alá esa tradición. Dese xeito, o grupo conseguiu acadar maior expresión, maiores posibilidades e un son propio que se plasma nos discos autoproducidos Tiruleque (2009), Mu!! (2013) e Outro que tal baila (2018). No 2022 celebrou o 20 aniversario da súa formación coa edición dun novo traballo discográfico composto por unha coidada escolma do seus mellores temas e unha xira de concertos co mesmo nome: “Tiruleque, 20 anos no camiño”.
Nas súas actuacións están presentes instrumentos unidos á música tradicional galega, mais empregados ao seu xeito. Reinterpretando en certa maneira a tradición, Tiruleque recorre á súa intuición musical á hora de arranxar melodías tradicionais e bota man da riqueza de instrumentos que esta música nos ofrece, pero dando un paso mais aló no uso das tonalidades e modos.
Co seu repertorio, Tiruleque leva percorrido a xeografía galega e estatal, deixando constancia da calidade os seus directos coa participación en festivais de recoñecido prestixio, como o Festival do Mundo Celta de Ortigueira en dúas ocasións , na pasada edición do Festival Intercético do Morrazo , Pardiñas ou Beltaine -Avilés Intercélticu. A nivel internacional participou representando a Galicia no 41º e 49º Festival Intercéltico de Lorient con grande éxito de crítica e público, no 2019 este último. Tamén ten compartido escenario con artistas da talla de Milladoiro, Xosé Manuel Budiño, Susana Seivane, Uxía, Treixadura, Tanxugueiras ou Kepa Junkera.
Tiruleque son: Alfonso Calvo (contrabaixo), Álex Fente (acordeóns), Pablo Pintor (bombo con pratos, percusións, coros), Miguel Horjales (caixa, percusión, coros), Serxo Núñez (clarinete, gaita, percusións, voz), Fernando Román (saxo soprano, clarinete, trompeta, ukelele), José A. Vázquez (gaita, saxo, percusións, coros)
Tiruleque na rede: